យន្តការបរធនបាលកិច្ចក្នុងបរិការណ៍នៃការវិវត្តថ្មីៗ

នារសៀលថ្ងៃព្រហស្បតិ៍ ៣រោច ខែមាឃ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៥ ខែកុម្ភៈ ឆ្នាំ២០២៦ និយ័តករបរធនបាលកិច្ច (ន.ប.ធ.) បានរៀបចំសិក្ខាសាលាស្តីពី “យន្តការបរធនបាលកិច្ចក្នុងបរិការណ៍នៃការវិវត្តថ្មីៗ” នៅអគារមជ្ឈមណ្ឌលអភិវឌ្ឍធុរកិច្ច។

កិច្ចពិភាក្សានេះ មានការអញ្ជើញចូលរួមដោយវាគ្មិនកិត្តិយសដែលសុទ្ធសឹងជាអ្នកជំនាញក្នុងវិស័យបរធនបាលកិច្ច, វិស័យធនាគារ និងវិស័យវាយតម្លៃអចលនវត្ថុ រួមមាន៖ ឯកឧត្តម ណី សាកល អគ្គនាយករងនៃនិយ័តករបរធនបាលកិច្ច,

បណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ភីអិលស៊ី, ឧកញ៉ា សន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា និង លោក ហុង ជៀប ប្រធាននាយកប្រតិបត្តិធនាគារ ស៊ីអាយអិមប៊ី ភីអិលស៊ី។ នៅក្នុងកម្មវិធីនេះ វាគ្មិនបានផ្តោតការពិភាក្សាអំពីកំណើនយ៉ាងឆាប់រហ័សរបស់ទីផ្សារបរធនបាលកិច្ច ដែលការណ៍នេះ គឺបានឆ្លុះបញ្ចាំងពីនិន្នាការកើនឡើងនៃការងាកទៅការប្រើប្រាស់យន្តការបរធនបាលកិច្ចនៅក្នុងសកម្មភាពវិនិយោគឯកជន និងសាធារណក្នុងវិស័យផ្សេងៗ និងពិភាក្សាអំពីអត្ថប្រយោជន៍នៃការប្រើប្រាស់យន្តការបរធនបាលកិច្ចដែលជាយន្តការផ្តល់ទំនុកចិត្តខ្ពស់ និងមានយន្តការតាមដាន និងត្រួតពិនិត្យច្បាស់លាស់។

លើសពីនេះ កម្មវិធីនេះក៏បានពិភាក្សាអំពីនិន្នាការនៃកំណើនក្នុងការប្រើប្រាស់ផលិតផលបរធនបាលកិច្ចសក្ដានុពលផ្សេងៗផងដែរ។ កម្មវិធីនេះមានការអញ្ជើញចូលរួមពីថ្នាក់ដឹកនាំជាន់ខ្ពស់នៃ ន.ប.ធ. និងមន្ត្រីជំនាញ និងលោក លោកស្រី តំណាងក្រុមហ៊ុនបរធនបាល, ប្រតិបត្តិករបរធនបាលផ្ដល់សេវារក្សាសុវត្ថិភាព ឬសេវារក្សាទុកក្នុងវិស័យបរធនបាលកិច្ច, ក្រុមហ៊ុនវាយតម្លៃក្នុងវិស័យបរធនបាលកិច្ច, ក្រុមហ៊ុនផ្ដល់សេវាសវនកម្ម និងបុគ្គលផ្ដល់សេវាពាក់ព័ន្ធក្នុងវិស័យបរធនបាលកិច្ច ព្រមទាំងសិក្ខាកាមនៃកម្មវិធីវគ្គបណ្ដុះបណ្ដាល និងការប្រឡងគុណវុឌ្ឍិ និងកម្មវិធីអប់រំវិជ្ជាជីវៈបន្ត ក្នុងវិស័យបរធនបាលកិច្ច លើកទី៨ ផងដែរ។